Lítið byggt í Hafnarfirði síðustu ár. Hafnarfjörður er eftirbátur annarra sveitarfélaga höfuðborgarsvæðisins þegar kemur að byggingu nýrra íbúða. Seltjarnarnes er eina sveitarfélagið á höfuðborgarsvæðinu þar sem færri íbúðir eru í byggingu. Engar stúdentaíbúðir rísa utan Reykjavíkur. Þetta kemur fram í nýrri úttekt Samtaka iðnaðarins á íbúðabyggingu á höfuðborgarsvæðinu.
Hafnarfjörður er þriðja fjölmennasta sveitarfélagið á höfuðborgarsvæðinu með um 13% íbúa þess. Þrátt fyrir það eru íbúðir í byggingu í Hafnarfirði aðeins um 4% af heildarfjölda íbúða í byggingu á höfuðborgarsvæðinu, eða 164 af 4127. Í Mosfellsbæ, þar sem íbúafjöldi er 40% af því sem hann er í Hafnarfirði, eru nánast tvöfalt fleiri íbúðir í byggingu, eða 309.
Íbúðum í byggingu í Hafnarfirði fjölgar örlítið frá því í fyrra. Þá voru 160 íbúðir í byggingu, eða 3% af íbúðum í byggingu á höfuðborgarsvæðinu. Árið 2018 var hlutdeild Hafnarfjarðar 2,5%, eða 122 íbúðir. Þá hafði íbúðum í byggingu fækkað um að meðaltali 50 íbúðir á ári frá árinu 2013.
Reykjavíkurborg hefur staðið undir langmestri íbúðauppbyggingu á höfuðborgarsvæðinu á undanförnum árum og í ár er engin breyting þar á. Af öllum íbúðum í byggingu á höfuðborgarsvæðinu eru 60% í Reykjavík, eða 2499 af 4127. Reykjavík er sömuleiðis eina sveitarfélagið á höfuðborgarsvæðinu sem reisir stúdentaíbúðir.
Flokkar:Uncategorized
Bæjarstjóri segir skiljanlegt að bæjarbúar séu ekki með allt á hreinu varðandi HS Veitur 
Meirihlutinn hafnaði íbúakosningu og selur hlut Hafnfirðinga í HS Veitum 
Tillögu um móttöku flóttabarna drepið á dreif – „Á meðan deyja börn á Lesbos“ 
HS Veitur: leynd hvílir yfir þóknun Kviku banka 
Bærinn okkar 